Югарыда тасвирланган ысул белән (графика челтәрен юллап сканерлау) эшләүче дисплейлар растрлы дисплейлар дип атала. Аклы-каралы һәм төсле дисплейлар була.

Электрон нур төшкән пиксель аклы-каралы экранда ак төс белән яктыртыла. Яктыртылмаган пиксель кара нокта булып кала. Электроннар агымының интенсивлыгы үзгәргәндә, арадаш соры тоннар барлыкка килә.

Төсле сурәт ничек туа? Төсле экрандагы һәрбер пиксель кызыл, яшел һәм зәңгәр төсләрдән торган өч ноктаның җыелмасы ул. Бу нокталар бер-берсенә шул дәрәҗәдә якын урнашкан ки, безгә алар гүя бер ноктага берләшкән кебек күренәләр.

Кызыл, яшел һәм зәңгәр төсләр кушылмасыннан экранда төсләрнең палитрасы барлыкка килә.

Төсле дисплейның электрон пушкасы өч нур җибәрә, һәр нур бары тик бер төстәге ноктаны гына яктырта. Моны булдыру өчен дисплейда махсус фокусланучы система кулланыла.

Хәзергесе вакытта электрон нурлы дисплейлар урынына сыек кристаллы (LCD) мониторлар алмашка килә. Алар кристалның анизотроп  үзлекләргә ия булган сыек матдәләрдән ясалган. Яктылык нуры көчәнеш астында булган бу матдә аша үткәндә үзенең сыйфатларын үзгәртә, нәтиҗәдә экранда кирәкле сүрәт барлыкка килә. Мондый мониторларның өстенлеге шунда, алар кеше сәламәтлеге өчен зарарлы нурлар таратмыйлар. Шуәа күрә алга таба тулысынча электрон нурлы мониторларны алыштырыр дип көтелә.

Дисплей эше белән видеоконтроллер (адаптер) дигән җай­ланма идарә итә. Ул ике өлештән—видеохәтер һәм дисплей процес-сорыннан гыйбарәт.

Видеохәтер видеомәгълүматны, ягъни экранга чыгарылган сурәтләрнең икешәрле кодын саклый.

Видеохәтердә экрандагы һәр пиксельнең халәте турындагы мәгълүмат саклана.

Видеохәтер — энергиягә бәйле электрон истә калдыру җай­ланмасы ул. Хәзерге компьютерлардагы видеохәтернең үлчәме бер­ничә мегабайт тәшкил итә. Видеохәтердә бер үк вакыт эчендә югары сыйфатлы график сурәттән торган берничә бит сакланырга мөмкин.

Видеоадаптерның икенче өлеше — дисплей процессоры.

Дисплей процессоры видеохәтер эчендәге мәгълүматны укый һәм шуңа яраклы рәвештә дисплей эше белән идарә итә.

Шул рәвешле, видеохәтергә үзәк процессорның һәм дисплей процессорының керү мөмкинлеге бар. Үзәк процессор видео­мәгълүматны яза, дисплей процессоры, аны укып, дисплейга тапшыра. Нәкъ менә дисплей процессоры видеохәтергә салынган

мәгълүматка ярашлы рәвештә электрон пушканың нурлары белән идарә итә.

         Санакка сүрәт кертү белән сканер шөгелләнә.

Сканер - сурәтләрне кәгазь битеннән яисә слайдтан компьютерга кертү җайланмасы.

Сканер графика адаптеры һәм дисплей башкарган эшләрнең капма-каршысын башкара кебек. Графика адаптеры икешәрле кодны дисплейда сурәткә үзгәртсә, сканер рәсемдәге, сызымдагы, фото­графиядәге сурәтне икешәрле кодка әйләндерә. Икешәрле код видеохәтергә яздырыла.

Сканерның исеме аның эш принцибына туры китереп бирелә: электрон нур дисплей экранын сканерлаган кебек, яктылык нуры яссы рәсемне юллап сканерлый.

Сканер ярдәмендә санакка кәгазь битенә басылган текстны да кертеп була. Текст укый (таный) торган махсус программаны кулланып, текст сурәтен текстлы форматка әйләндерергә мөмкин.